laat weet

info

ander studies

vertel      

      epos

homepage

antwoordblad

donasies

B

Y

B

E

L

S

T 

U

D

I 

E

A

A

N

L

Y

N 

W

E

E

K

2

 ..Verruim Jou Ingeligte Opinie Met Lekker, Kreatiewe Aflaai&Eposklets Bybelstudies..!

Deel saam met ons in die gebed:

Here, gee ons asseblief wysheid en insig as ons vandag Jou Woord ondersoek om beter te probeer verstaan wat vergewe beteken - en wat dit soms NIE beteken nie.

Gee asseblief vir ons 'n ware vergewensgesindheid. Gee vir ons 'n bereidheid om self ook ander te vergewe soos Jy ons vergewe het.

Ons weet dat Jy die almagtige Regter is wat uiteindelik regverdig oor elke mens sal oordeel volgens alles wat ons gedoen het. Ons weet ook dat Jy ons genadige Vader is en dat dit nie ongesiens by Jou verbygaan wanneer ons deur mense seergemaak word nie.

Dankie dat ons altyd ons saak met vertroue in Jou Hand kan laat en dat ons as individue nie die reg in eie hande hoef te neem nie. Maar dankie ook vir die stem wat ons elkeen het in 'n demokratiese landsbestel wat uitdrukking moet vind in 'n regering wat die volk verteenwoordig: Help ons asseblief om prakties te onderskei hoe die mense van 'n land hulle kollektiewe plig om te straf moet balanseer met die plig om genadig te wees, soos wat Jy genadig is, ons Vader.

Dit alles vra ons in die Naam van die Een in Wie se Naam ons vergewe is: In Jou Naam Here Jesus.

 Amen.

Laasweek het ons gekyk na hoe Paulus vergewe het. Dié week spring ons weg deur te kyk hoe die gelowiges wat reeds by God in die Hemel is, kyk na vergewe..

In die boek Hebreërs lees ons.. 

 Julle het immers nie gekom by 'n tasbare berg met brandende vuur, donderwolke, duisternis, stormwind, trompetgeskal en geklank van woorde nie. Hulle wat dit gehoor het, het gesmeek dat geen woord meer tot hulle gerig moes word nie. Die bevel dat selfs 'n dier wat aan die berg raak, met klippe doodgegooi moet word, was vir hulle ondraaglik. So angswekkend was die verskynsel dat Moses uitgeroep het: “Ek sidder van angs!”

  Maar julle het wel gekom by Sionsberg en die stad van die lewende God, dit is die hemelse Jerusalem met sy miljoene engele, by die feestelike samekoms, die vergadering van die eersgeborenes wie se name in die hemel opgeteken is.

 Julle het gekom by God wat Regter oor almal is, en by die geeste van dié wat vrygespreek en wat nou volmaak is, by Jesus, die Middelaar van die nuwe verbond, en by die besprinkelingsbloed wat van iets beters getuig as die bloed van Abel.

 Pas op, moet Hom wat met julle praat, nie afwys nie. Hulle wat Hom afgewys het toe Hy sy Goddelike woord op aarde laat hoor het, het nie ontkom nie. Hoeveel minder sal ons ontkom wanneer ons nie ag slaan op Hom wat van die hemel af met ons praat nie?

Heb 12:18-25

"Julle het gekom by God wat Regter oor almal is, en by die geeste van dié wat vrygespreek en wat

nou

volmaak is,

by Jesus,

die Middelaar van die nuwe verbond" Heb 12:23-24

"En dink ook aan die mense van Sodom en Gomorra en die stede rondom hulle. As waarskuwing vir almal word hulle

nou

gestraf met die vuur wat ewig brand." Judas 1:7

Ons reken die woord volmaak in Heb 12:23 dui inderdaad aan dat die geeste van dié wat vrygespreek, en nou in die hemelse Jerusalem by Jesus is - in elke opsig tot finale voortreflikheid gebring is; dat hulle nou feilloos is; dat niks aan hulle ontbreek nie en hulle sonder enige gebrek is; dat hulle volkome en perfek geword het.

Die Here Jesus se opdrag in Matt 5:38-41 was: “Julle het gehoor dat daar gesê is: ‘'n Oog vir 'n oog en 'n tand vir 'n tand.’ Maar Ek sê vir julle: Julle moet julle nie teen 'n kwaadwillige mens verset nie.

As iemand jou op die regterwang slaan, draai ook die ander wang na hom toe. As iemand jou hof toe wil vat om jou onderklere te eis, gee hom ook jou boklere.

As iemand jou dwing om sy goed een kilometer ver te dra, dra dit vir hom twee kilometer."

Dan, in die sesde hoofstuk van Jesus se Openbaring aan Johannes, toe Hy in 'n gesig aan Johannes verskyn het op die eiland Patmos - wys Jesus vir Johannes iets wat 'n mens nogal kan laat wonder wat ons plig om te vergewe presies behels?

 Kom ons kyk daarna..

 Jesus se Openbaring aan Johannes..

Toe die Lam die vyfde seël oopmaak, het ek onder die altaar die siele gesien van die mense wat doodgemaak is omdat hulle aan die woord van God en aan die getuienis van Jesus vasgehou het.

"Wanneer voltrek U die oordeel en wreek U ons dood op die bewoners van die aarde?"

Hulle het hard geroep: “Hoe lank nog, heilige en getroue Heerser? Wanneer voltrek U die oordeel en wreek U ons dood op die bewoners van die aarde?”

 Aan elkeen van hulle is daar lang wit klere gegee, en daar is vir hulle gesê om nog 'n klein rukkie te wag, totdat hulle mededienaars, hulle medegelowiges, wat net soos hulle ook doodgemaak gaan word, almal daar is.

  Openbaring 6:9-12 (NAV)

Kyk net wat roep hulle hard uit tot God..! Klink hierdie hemelse gelowiges wat vroeër op aarde doodgemaak is omdat hulle aan die woord van God en aan die getuienis van Jesus vasgehou het vir jou of hulle hulle moordenaars vergewe het, of is hulle daar in die hemel ongehoorsaam aan Jesus wat ons leer bid het: "vergeef ons ons oortredings soos ons ook dié vergewe wat teen ons oortree"?

 Natuurlik kan gelowiges in die hemel nie ongehoorsaam wees aan God nie! Die vraag is dus nie regtig OF hulle hulle moordenaars vergewe het nie, die vraag is eerder wat só 'n vergifnis sou behels! Dié openbaring van Jesus aan Johannes dwing 'n mens om jou idee te verruim oor wat vergewe onder uiterste omstandighede soos moord behels!! Vergewe beteken vir dié hemelse gelowiges dat hulle God vertrou om hulle dood te wreek op hulle moordenaars. Dit is egter nie maar 'n passiewe, agteroorsit-vertroue nie! Nee! Hulle ROEP tot God: "Hoe LANK nog?"

As die hemelse gelowiges na God roep om WRAAK, dan is God se reaksie nie 'n teregwysing nie! Inteendeel, in antwoord op hulle roepe dat hulle dood GEWREEK sal word, word aan elkeen van hulle lang wit klere gegee, en hulle word getroos met die woorde dat hulle nog 'n klein rukkie moet wag, totdat hulle mededienaars, hulle medegelowiges, wat net soos hulle ook doodgemaak gaan word, almal daar is.

Self ontvang die gelowiges wit klere terwyl hulle wag op die wraak-optrede van die Een oor Wie daar geskryf is:

"Hy trek geregtigheid aan soos 'n pantser en redding is die helm op sy kop; Hy trek straf aan as klere, Hy hang woede om Hom soos 'n mantel. Hy vergeld volgens verdienste: toorn vir sy teëstanders, straf vir sy vyande, vergelding vir die eilande soos hulle verdien." JES 59:17-18

Oor Hom getuig Johannes: Die hare op sy kop was wit soos wit wol, soos sneeu, en sy oë het soos vuur gevlam. Sy voete was soos geelkoper wat in 'n smeltoond gloei, en sy stem soos die gedruis van 'n groot watermassa. In sy regterhand het Hy sewe sterre gehad, en 'n skerp swaard met twee snykante het uit sy mond uit gekom. Openbaring 1:14-16

Ons reken dat as die Here God dié volmaakte gelowiges wat tot die dood toe aan Hom getrou gebly het se roepe om wraak in die hemel toelaat, dan is ons, die onvolmaakte gelowiges hier op aarde verseker NIE in 'n posisie om te oordeel dat hulle versugting te kras is nie. Inteendeel, ons moet eerder die voorbeeld volg van ons God wat hulle eer deur aan hulle lang, wit klere te gee.

Ons sien dat gelowiges in sommige gevalle hard mag roep dat God misdade teen hulle sal WREEK - sonder dat dit indruis teen God se bevel dat ons dié wat teen ons oortree moet vergewe, soos Hy ons vergewe het. 'n Vraag wat al hoe dringender word en waarby ons later in die studie sal moet stilstaan is: Hoe onderskei mens in watter gevalle só 'n roepe om wraak die regte ding is, en in watter gevalle sou dit absoluut verkeerd wees?

Hoe dink die skrywers van bekende Bybelkommentare oor dié Openbaring 6 teks? "Die Bybel Verklaar" en "Die Bybel A-Z" sê niks onverwags nie, maar "Die Bybellennium" gee 'n ander perspektief. Daar sê die skrywer:

"Dit klink byna of dié martelare om wraak roep as hulle sê: "Hoe lank nog? .. Wanneer .. wreek U ons dood op die bewonders van die aarde?" Roep hulle regtig om wraak? Nee, nie om persoonlike wraak nie maar om die handhawing van die regverdige eer van God." Bybellennium, bl 1781

As dié kommentaar se perspektief korrek was sou mens verwag dat die gelowiges se gebed eerder sou lui: “Hoe lank nog, heilige en getroue Heerser? Wanneer voltrek U die oordeel en wreek U die skending van U eer op die bewoners van die aarde?” Dit is egter nie wat daar staan nie en ons kan die gelowiges nie ander woorde in die mond lê as hulle woorde ons ongemaklik laat voel nie. Hulle sê duidelik wat hulle bedoel.

 Die Bybellennium se kommentaar verander nie ons beskouing van Openbaring 6:10 nie. Die gelowiges sê self baie duidelik wat hulle bedoel: Hulle wil weet wanneer God hulle dood gaan wreek. As iemand God se kinders te na kom - raak dit God direk, en die gelowiges weet dit! Deut 32:10 stel dit baie mooi: "Die Here het sy volk omhels, hom vertroetel en versorg SOOS DIE APPEL VAN SY OOG." Ps 116:15 bevestig dit: "Vir die Here is die dood van sy troue dienaars geen geringe saak nie."

 Die Bybel is 'n boek sonder foto's, maar vol illustrasies: Wat in teorie vir ons geleer word - word in verhale vir ons geïllustreer!

Die verhale in die Bybel help ons om wat ons in teorie geleer word beter te verstaan. Enersyds sê die Wet byvoorbeeld: "Jy mag nie moord pleeg nie." Andersyds illustreer die talle oorlogsverhale in die Skrif vir ons dat doodmaak in 'n Godsbeveelde oorlog NIE moord pleeg is nie.

Enersyds word ons in teorie geleer om dié wat teen ons oortree te vergewe, soos God ons ook vergewe - en andersyds illustreer die Skrif vir ons in die somtotaal van talle Bybelverhale wat vergewe in die praktyk beteken, en wat vergewe nié beteken nie..

As ons eers na die geïllustreerde waarheid in die verhalende dele van die Bybel gekyk het, dan dwing dit ons TERUG na die teorie - om FYNER te kyk na wat presies God regtig vir ons daar sê..

In 1Kor 13:4-5 leer God vir ons by monde van dieselfde apostel Paulus wat in praktyk geweier het om Johannes Markus saam te neem op sy tweede sendingreis, omdat dié hom in die steek gelaat het tydens die eerste sendingreis: "Die liefde is geduldig, die liefde is vriendelik; dit is nie afgunstig nie, is nie grootpraterig nie, is nie verwaand nie. Dit handel nie onwelvoeglik nie, soek nie sy eie belang nie, is nie liggeraak nie, hou nie boek van die kwaad nie.

In 1Kor 13:5 sê Paulus: "Die liefde.. hou nie boek van die kwaad nie." Dié beeldspraak roep die beeld op van iemand wat soos 'n boekhouer rekening hou van wat mense hom skuld. Ons mag nie soos 'n boekhouer rekening hou van kwaad wat mense ons aandoen nie. Om dit te doen bots met die karakter van die liefde. Die liefde vergewe die kwaad wat mense ons aandoen: Die liefde skeur sewentig maal sewe keer die skuldbewys teen ons medemens uit die rekeningboek en slaan 'n nuwe blaadjie om.